ਤਾਜਾ ਖਬਰਾਂ
ਪਿੰਡ ਸਿਆਣਾ (ਨਗਰ ਕੌਂਸਲ ਬਲਾਚੌਰ) ਵਿੱਚ ਵਾਰਡ ਨੰਬਰ 12 ਦੇ ਕੌਂਸਲਰ ਰਾਧੇ ਸ਼ਾਮ ਦੀ ਅਗਵਾਈ ਹੇਠ ਰਵਾਇਤੀ ਅਤੇ ਜਾਨਦਾਰ ਖੇਡ ‘ਥੱਪ’ ਦਾ ਸ਼ਾਨਦਾਰ ਮੁਕਾਬਲਾ ਕਰਵਾਇਆ ਗਿਆ। ਮੁੱਖ ਮਹਿਮਾਨ ਵਜੋਂ ਨਗਰ ਕੌਂਸਲ ਦੇ ਪ੍ਰਧਾਨ ਸੁਨੀਲ ਕੌਸ਼ਲ ਲਾਡੀ ਸਾਲ ਮੌਜੂਦ ਰਹੇ। ਪਿੰਡ ਦੀ ਸਮੂਹ ਕਮੇਟੀ ਵੱਲੋਂ ਹਰ ਸਾਲ ਇਸ ਪ੍ਰਾਚੀਨ ਖੇਡ ਨੂੰ ਮੁਕਾਬਲੇ ਦਾ ਰੂਪ ਦੇ ਕੇ ਜੇਤੂ ਖਿਡਾਰੀਆਂ ਲਈ ਇਨਾਮਾਂ ਦੀ ਵਿਵਸਥਾ ਕੀਤੀ ਜਾਂਦੀ ਹੈ, ਜਿਸ ਨਾਲ ਨਿਰੰਤਰ ਖਿਡਾਰੀਆਂ ਦਾ ਮਨੋਬਲ ਵਧ ਰਿਹਾ ਹੈ ਅਤੇ ਦਰਸ਼ਕਾਂ ਦੀ ਦਿਲਚਸਪੀ ਵੀ ਕਾਫੀ ਗਹਿਰੀ ਹੋ ਰਹੀ ਹੈ।
ਇਹ ਖੇਡ ਆਪਣੇ ਅਨੋਖੇ ਅਤੇ ਰਿਸਕੀ ਅੰਦਾਜ਼ ਕਾਰਨ ਕਿਸੇ ਵੀ ਜਿੰਮਨਾਸਟਿਕਸ ਤੋਂ ਘੱਟ ਨਹੀਂ। ਇਸ ਵਿੱਚ ਸਖ਼ਤ ਤਾਕਤ ਅਤੇ ਸੰਤੁਲਨ ਦੀ ਲੋੜ ਹੁੰਦੀ ਹੈ—ਗੱਭਰੂ ਭੱਜਦਿਆਂ ਮੰਜਿਆਂ ਦੇ ਉੱਪਰ ਇਕੋ ਵਾਰ ਵਿੱਚ ਉੱਚੀ ਛਾਲ ਮਾਰਦੇ ਹਨ ਅਤੇ ਬਿਨਾਂ ਮੰਜੇ ਹਿਲਾਏ ਉਨ੍ਹਾਂ ਨੂੰ ਪਾਰ ਕਰ ਜਾਂਦੇ ਹਨ। ਖੇਡ ਦੇ ਇਸ ਰੋਮਾਂਚਕ ਦ੍ਰਿਸ਼ ਨੂੰ ਦੇਖਣ ਲਈ ਨੇੜਲੇ ਪਿੰਡਾਂ ਤੋਂ ਵੀ ਵੱਡੀ ਗਿਣਤੀ ਵਿੱਚ ਲੋਕ ਇਕੱਠੇ ਹੋਏ। ਪ੍ਰਬੰਧਕ ਕਮੇਟੀ ਦੇ ਸੁਰਿੰਦਰ ਸਿੰਘ ਫੌਜੀ, ਚੌਧਰੀ ਹਰਬੰਸ ਲਾਲ, ਮੁਖਤਾਰ ਸਿੰਘ, ਜਗਤਾਰ ਸਿੰਘ ਧਾਰੀਵਾਲ, ਰਵਿੰਦਰ ਰਵੀ, ਇੰਦਰਜੀਤ ਸ਼ੇਰ ਗਿੱਲ, ਮਣੀ ਬਾਬਾ, ਬਲਰਾਮ ਸਿੰਘ, ਕਾਮਰੇਡ ਭਿੰਦਾ ਅਤੇ ਸਾਬਕਾ ਕੌਂਸਲਰ ਸਿਮਰੂ ਰਾਮ ਨੇ ਖੇਡ ਦੇ ਸੁਚਾਰੂ ਪ੍ਰਬੰਧ ਦੀ ਜ਼ਿੰਮੇਵਾਰੀ ਨਿਭਾਈ।
ਮੁਕਾਬਲੇ ਵਿੱਚ ਰਾਜਕੁਮਾਰ (ਪਿੰਡ ਸ਼ੋਕਰਾ) ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਪਹਿਲਾ ਸਥਾਨ ਹਾਸਲ ਕੀਤਾ, ਜਦੋਂ ਕਿ ਬਖਸ਼ੀਸ਼ ਸਿੰਘ (ਪਿੰਡ ਮਹਤਪਰ ਲੱਧਣੀ) ਦੂਜੇ ਸਥਾਨ ’ਤੇ ਅਤੇ ਸਤੀਸ਼ ਕੁਮਾਰ (ਪਿੰਡ ਬਖਲੌਰ) ਤੀਜੇ ਸਥਾਨ ’ਤੇ ਰਹੇ। ਇਸ ਮੌਕੇ ਮਹਿੰਦਰ ਸਿੰਘ ਕੋਚ ਸਰਪੰਚ ਪਿੰਡ ਬਰਨਾਲਾ ਖੁਰਦ ਵੀ ਹਾਜ਼ਰ ਸਨ। ਕੁਲਦੀਪ ਸਿੰਘ ਢੋਲੀ ਨੇ ਆਪਣੇ ਢੋਲ ਦੀਆਂ ਧੁਨਾਂ ਨਾਲ ਖਿਡਾਰੀਆਂ ਦਾ ਜੋਸ਼ ਵਧਾਇਆ, ਜਦੋਂ ਕਿ ਮਾਤਾ ਅਮਰ ਕੌਰ ਪਿੰਡ ਰਕਾਸਣ ਬਾਜੀਗਰ ਪਰਿਵਾਰ ਨੂੰ ਵੀ ਸਨਮਾਨਿਤ ਕੀਤਾ ਗਿਆ। ਜੇਤੂਆਂ ਨੂੰ ਨਗਦ ਇਨਾਮ ਅਤੇ ਸਨਮਾਨ ਚਿੰਨ੍ਹ ਭੇਟ ਕੀਤੇ ਗਏ। ਕਮੇਟੀ ਵੱਲੋਂ ਇਹ ਭਰੋਸਾ ਜਤਾਇਆ ਗਿਆ ਕਿ ਆਉਣ ਵਾਲੇ ਸਮੇਂ ਵਿੱਚ ‘ਥੱਪ’ ਦੀ ਇਸ ਵਿਰਾਸਤੀ ਖੇਡ ਨੂੰ ਹੋਰ ਵੱਡੇ ਪੱਧਰ ’ਤੇ ਲਿਆ ਕੇ ਪੰਜਾਬ ਦੀ ਇਸ ਧਰੋਹਰ ਨੂੰ ਜਿਉਂਦਾ ਰੱਖਿਆ ਜਾਵੇਗਾ।
Get all latest content delivered to your email a few times a month.
